Mat 16 | GAM | STEP | Parisi una ne, Sadusi una Jisas moi al wo une kamale to embe dji, ni God kogoye kaima yen dal, kogo dongall ta yembenka kanbon we dji.

Matthew 16

Una, Jisas, ni kogo dongall ta yembenka no kanbon we dji

(Mak 8.11-13 ne, Luk 12.54-56)

1 Parisi una ne, Sadusi una Jisas moi al wo une kamale to embe dji, ni God kogoye kaima yen dal, kogo dongall ta yembenka kanbon we dji. 2 Djimaka Jisas embe dji, emill kindja djindaka kupill bage yendaka, ye kandja embe djinj, aka donda dje pille yendo we djinj. 3 Kam kumaike kana kupa kama tondaka, kupill bage yendaka, ye kandja embe djinj, ge kopo wo, kam tonda pille yendo we djinj. Kupill paro mal ge ye dje kune yenj. Ba, God kogo ipon manda yendo ge ye namba yei pille kanpol natonj? 4 Una ipon mor ge iwana singare ke ye, nomane ke pai mor. Ege ege kambono embe djinj, God kogo dongall yenda kanbon we djinj. Ba God kogo dongall ta nayenda. Kogo taimanta yenda ge embe. Kamasa God Jona boll kogo dongall ta yei ge, ye wal ge kanne we dji. Jisas kandja embe dje kere er pi.

Jisas yis kandja buko dji

(Mak 8.14-21)

5 Jisas kogoye una boll kanu al pakna po er nu erim yemto pi. Kogoye una bret nane mal naiwi, dall yei. Jisas embe dji, 6 una bret gale yis worinjka, yake wo kerman pundo mal Parisi una ne, Sadusi una kandja djinj ge embe mal paro, ye kanpol tane we dji. 7 Kogoye una pillpol natoi, yenekne kandja dje embe dji, une kandja djindo ge no bret naiupin pille djindo we dji. 8 Jisas pille embe dji, ye pillgi kembis pai paro. No bret naiupin we djinj ge, namba yei pille djinj? 9 Na una paip tausan (5,000) kwa awill ge ye pille kane nayei mo? Bret 5-pela yeika una no kune yei, tuge moi ge una i djengill kon merke to puka toi. 10 Na una po tausan (4,000) kwa awill ge ye pille kane nayei mo? Bret 7-pela yeika una no kune yei, tuge moi ge una i djengill kon merke to puka toi. 11 Na kandja djill ye napi ge namba mal ye napi? Na kandja djill ge bret pille nadjill. Parisi una ne, Sadusi una kandja djinj mal ge pille djill we dji. 12 Jisas kandja embe djika kogoye una pille kune yei. Une bret pille nadji; una bret gale yis worinjka, yake wo kerman pundo mal Parisi una ne, Sadusi una kandja kende djinj dje pille dji.

Jisas kaima moi mal Pita dje pene wori

(Mak 8.27-30 ne, Luk 9.18-21)

13 Jisas kogoye una boll er dumo Sisaria Pilipai pi. Kogoye una moi al une embe dji, na Una Wombe moro ge una mor ge na una ne mal kaima moro ne djinj? 14 Djika kogoye una embe dji, una pende embe djinj, ni Jon nu pagle awi una wonden we djinj. Pende, ni iwa Ilaija asa goi ge wonden we djinj. Pende, ni Jeremaia asa goi ge wonden we djinj. Pende, Propet ta kamasa goi ge ni wonden we djinj we dji. 15 Djimaka Jisas pille embe dji, una embe djinj ba ye na una ne wondo ne dje kaninj ne? dji. 16 Djika Saimon Pita embe dji, God gun moro una Krais dje worno wonda we dji ge ni wale wonden. Ni God warye moren we dji. 17 Djika Jisas Pita moi al embe dji, Saimon Jon wariye moren ge, God ni ye wopake ye awi moren. Ni kandja djin ge makimb una ta dji pille nadjin, na nena kupill al molo ombine dje awi mal ge ni kandja embe djin. 18 Na kandja dje ni aundo, ni Pita moren. Ku dongall paro mal ge ni moren. Na kandjina pillgi pai una mor ge ^{▼▼Na kandjina pillgi pai una mor we dje bolo wori pai ge, kandja tok pisin al ge sios we djimon. Sios kandja me ge, una Jisas boll pillgi djine una mor.} na amblo iwo ni moren al numb dongall takno. Satan epiliye boll wo ye boll kunda yene ba, yene kune nayenda. 19 God dumoye wopake kantau yendo ki yero ge, na ni aundo. Ni makimb al molo, embe nayene we djimben mal God kupill al molo, embe nayene we djinda. Ni makimb al molo, kune, embe yene we djimben mal God kupill al molo, kune, embe yene we djinda. 20 God na Krais dje wori yene unakiye i yem worno dje woll mal, ye nadjime! dji.

Jisas, na golo agle er wo gun puno we dji

(Mak 8.31—9.1 ne, Luk 9.22-27)

21 Jisas kogoye una moi al kandja gun dje awo embe dji, na Jerusalem punaka Juda ngambalne pai una ne, opa gale awinj una kerman ne, God lo dje awinj una mor ge na gaklena ngembill awo to goye. Ege sokara er wo pundaka na alla agle er wo gun puno we dji.

22 Djika Pita Jisas dje i orko po embe dji, Iwa Kerman, ni kandja djinden ge kere! Una ni to nagoye, man! we dji. 23 Djika Jisas Pita moi al kandja awo embe dji, Satan, ni kere er na mopnato piye! Na kond puno al ge, ni na kond tugo aunden. Ni God nomane paro mal kandja nadjinden, makimb una nomane paro mal ni kandja djinden we dji.

24 Jisas kogoye una moi al embe dji, una na boll wombon dje piye ge, yenekne nomane paro mal amblo kal woro, yenekne iko pera kake i, na boll wone. 25 Una yenekne amblokun ye moi dal, goye ba, alla una na we dje pille we ye molo goi dal, gun moye. 26 Una makimb al molo kog mogoi porapora kane nane ge, golo pine ba, golo pine ge wal naral wal i nane? Wal naral wal awo alla gun moye? Man, wal ge nayenda. 27 Are God dje wordaka, Una Wombe God yembe dongall boll pandaka une tau agelo boll yem wone kune ge, kot panda. Una porapora makimb al singare ke wopake yene mal, Una Wombe awo yem woro aunda. 28 Na kandja kaima dje ye aundo, ye una pende mor ge nagoye, mor mal embe moyeke, are Una Wombe wo king moya mal ye kanne we dji.